Сентябрьдә 2018 елда футбол буенча дөнья чемпионатын кабул итүче шәһәрләр исемлеге билгеле булачак – Мутко

Агымдагы елның сентябрендә 2018 елда футбол буенча дөнья чемпионаты уеннарын кабул итүче Россия шәһәрләренең исемлеге билгеле булачак. Бүген РФ спорт, туризм һәм яшьләр сәясәте министры, “Россия-2018” Оештыру комитеты рәисе Виталий Мутко “Россия-2018” Оештыру комитетының Мәскәүдә узган тәүге матбугат конференциясендә әнә шул хакта хәбәр итте.
Искәртеп үтәбез, турнир матчларын кабул итәчәк шәһәрләрнең башлангыч исемлегендә Мәскәү, Санкт-Петербург, Калининград, Волгоград, Казан, Түбән Новгород, Саранск, Самара, Ярославль, Краснодар, Ростов-Дон, Сочи һәм Екатеринбург калалары бар.
Виталий Мутко билгеләп үткәнчә, 2018 елгы дөнья чемпионаты концепциясе мундиальне дүрт кластерда үткәрүне күздә тота. “Әлегә бездә 13 кандидат-шәһәр һәм чемпионат матчларын уздыру планлаштырылган 15 стадион бар. ФИФА белән берлектә без тиешле минимум 11 шәһәр һәм 12 стадионнан торырга тиеш дигән нәтиҗәгә килдек. Бу без башка төбәкләрне игътибардан читтә калдырабыз дигән сүз түгел, әмма бер матч үткәрү өчен стадион төзүнең дә мәгънәсе юк”, - дип белдерде министр. Аның сүзләренә караганда, агымдагы елның сентябрендә ФИФА вәкилләренең тикшерү визитларыннан соң кайсы шәһәрләр һәм ареналар калачагы турында хәлиткеч карар кабул ителәчәк. Чемпионат ачылышы һәм финал, һичшиксез, Мәскәүнең “Лужники» стадионында узачак. Бер ярымфиналны Санкт-Петербург кабул итәчәк. “2018 елгы дөнья чемпионаты алдыннан берничә тест, шул исәптән конфедерация Кубогы үткәреләчәк. Аны Мәскәү, Санкт-Петербург, Сочи һәм Казан шәһәрләре кабул итәчәк”, - дип ассызыклады Мутко.
Үз чиратында, “Россия-2018” Оештыру комитеты генераль директоры Алексей Сорокин шәһәрләрне сайлап алуның 5 төп критериен тәкъдим итте һәм алдагы турнирны стратегик яктан ничек күзаллавы хакында сөйләде. Аның сүзләренә караганда, Россиядә мундиальне ихлас күңелдән үткәрергә, Россиянең кунакчыллыгын һәрьяклап күрсәтергә кирәк.
Алексей Сорокин шәһәрләрне сайлап алуның 5 критериен һәм 31 субкритериен билгеләде. Төп критерийлар мондый: төбәкләрнең инфструктура белән тәэмин ителеше, социаль-икътисади үсеш, 2018 елгы дөнья чемпионатына әзерләнүдә инвестицион программа, 2018 елгы дөнья чемпионатын үткәрү концепциясе һәм 2018 елгы дөнья чемпионаты мирасыннан нәтиҗәле файдалану.
Матбугат конференциясе барышында 2018 елгы футбол буенча дөнья чемпионатының вакытлы эмблемасы да тәкъдим ителде. Даими эмблема бары тик 2014 елда Бразилиядә узачак дөнья чемпионатыннан соң гына булдырылырга мөмкин, әмма ФИФА Россиягә искәрмә ясады. “Безгә вакытлы бренд булдыру хокукы бирелде. Без моны Бразилиядә узачак дөнья чемпионатыннан соң эшләргә тиеш идек, әмма хәзер безнең чемпионатның имиджын булдырырга телибез”, - диде Россия спорт, туризм һәм яшьләр сәясәте министры. Матбугат конференциясендә шулай ук дөнья чемпионатының тәүге илчесе дә тәкъдим ителде.