Баулы районында капремонттан соң йөзү бассейны ачылды
Яңартылган бассейн беренче килүчеләрне кабул итәргә әзер.
4 март көнне Баулы районында капиталь ремонттан соң «Нефтьче» бассейнын ачу тантанасы булды. Ачылу тантанасында район башлыгы Рамил Гатиятуллин һәм спорт һәм педагогик хезмәт ветераны Петр Потапов катнашты, алар җирле халыкны сәламләделәр һәм яңартылган объект ачылу белән котладылар. Шул ук көнне Потаповка Бөек Ватан сугышында җиңүнең 75 еллыгына багышланган истәлекле медаль тапшырылды.
Бассейнны капиталь ремонтлау 2018 елда башланды, ремонт эшләренә 100 млн.сумга якын акча бүлеп бирелде. Спорт һәм көрәш заллары, шулай ук 25 метрлы һәм балалар өчен ике йөзү бассейны чынаяклары тулысынча яңартылды. Отделка һәм электромонтаж эшләре башкарылды, вентиляция системасы, түбә һәм керү төркеме ремонтланды, бассейннарны су әзерләү системасы яңартылды.
Капиталь ремонт барышында сәламәтлек мөмкинлекләре чикләнгән затлар өчен объектның һәркем өчен мөмкин булуын тәэмин итү ихтыяҗы исәпкә алынган (төп керү урынында пандус урнаштырылган, санитар-гигиеник бина җайлаштырылган, суга төшерү өчен күтәргеч сатып алынган).
Объектта Баулы муниципаль районының 2 нче спорт мәктәбе эшли. Бүгенге көндә биредә 350гә якын кеше шөгыльләнә, спортның 6 төре: йөзү, футбол, волейбол, грек-рим көрәше, көрәш, билбау көрәше буенча 3 бүлек эшли.
Спорт корылмаларын төзү һәм ремонтлау – «Демография» милли проектының «Спорт-тормыш нормасы»федераль проектын гамәлгә ашыру кысаларында Татарстан Республикасында гамәлгә ашырыла торган бурычларның берсе. Ул сәламәт яшәү рәвеше алып баручы гражданнарның өлешен, шулай ук физик культура һәм спорт белән даими шөгыльләнүче гражданнарның Россия Федерациясендә 55% ка кадәр арттыруны күздә тота.
Әлеге күрсәткеч халыкны мотивацияләү системасын булдыру, барлык дәрәҗәләрдә һәм корпоратив мохиттә спорт-массакүләм эшен активлаштыру, спорт резервын әзерләү һәм спорт инфраструктурасын үстерү юлы белән ирешеләчәк.
Россиянең милли проектларын билгеләүче һәм раслаучы «2024 елга кадәрге чорга Россия Федерациясе үсешенең милли максатлары һәм стратегик бурычлары турында» тиешле указга Россия Президенты Владимир Путин 2018 елның 7 маенда кул куйды.