Ефим Климов суга сикерү федерациясенең яңа президенты итеп билгеләнде
Шимбә көнне, 29 гыйнварда, Су спорт төрләре сараенда Татарстан Республикасының суга сикерү федерациясенең чираттан тыш хисап-сайлау конференциясе узды. Утырышта Яшьләр эшләре буенча Федераль агентлык җитәкчесе урынбасары Дамир Фәттахов, ТР Спорт министры Владимир Леонов, Казан шәһәре Думасы депутаты Ефим Климов, шулай ук спортчылар һәм тренерлар катнашты.
Көн тәртибендәге төп мәсьәлә-Федерация Президентын яңадан сайлаулар булды. Исегезгә төшерәбез, 2016 елдан әлеге вазифаны Дамир Фәттахов биләгән иде.
«Ерак 2015 елда без суга сикерү кебек матур һәм мавыктыргыч спорт төрен яңадан торгызу турында уйладык. Ул вакытта бездә берни дә юк иде, һәм менә, 6 елдан соң актив эш узгач, Татарстан илдә иң яхшы инфраструктурага ия. Хәзер спортчыларны әзерләү өчен кирәкле бөтен нәрсә дә бар. Моның өчен Дамир Илдус улына аерым рәхмәт! Ул вакытта ул федерацияне җитәкләргә ризалашты, һәм хәзер федерациядә булган барлык нәтиҗәләр аның кураторы һәм эшкә битараф булмаган мөнәсәбәте белән бәйле. Шуңа да карамастан, без моңа тукталып калырга җыенмыйбыз һәм үз алдыбызга тагын да амбициоз бурычлар куябыз», - диде Владимир Леонов.
Коллектив карары белән Федерациянең яңа президенты итеп Казан шәһәре Думасы депутаты Ефим Климов сайланды.
«Мондый ярдәм өчен зур рәхмәт сүзләрен җиткерәсем килә. Минем өчен бу бик кыйммәтле. Федерация яшь, әмма моңа карамастан, ул инде яхшы нәтиҗәләргә ия. Дамир Илдусовичтан соң бу эстафетаны алу минем өчен җиңел түгел, әмма инде әйткәнебезчә, фундамент салынды. Хәзер безнең бурыч-бу эшне алга таба да үстерү», - дип сөйләде Ефим Климов.
ТР Спорт министры Владимир Леонов шулай ук Ефим Сергеевичның Татарстанда суга сикерүне дәвам итү өчен барлык кирәкле сыйфатларга ия булуын билгеләп үтте:
«Ул спорт белән шөгыльләнүче кеше. Без Ефим Сергеевич дөрес юнәлештә хәрәкәт итәчәгенә һәм Федерация алдына куйган бурычлар иң югары дәрәҗәдә үтәләчәгенә ышанабыз».