Казанда Көрәш буенча Россия беренчелеге узачак

2022 елның 10 марты, пәнҗешәмбе

11-13 мартта Казанда Идел буе дәүләт физик культура, спорт һәм туризм университетында билбау көрәше буенча Россия беренчелеге узачак. Ярышларда Россиянең 25 тән артык төбәгеннән 200дән артык спортчы катнашачак.

13-14 яшьлек, 15-16 яшьлек һәм 17-18 яшьлек көрәшчеләр тугыз авырлык категориясендә көч сынашачак. Өлкән яшь категориясендәге тантаналы чаралар һәм финал ярышлары 12 мартта 18: 30 сәгатьтә югары уку йортының укыту-лаборатория комплексының универсаль залында узачак.

Шуны да билгеләп үтәргә кирәк, турнир нәтиҗәләре буенча иң көчле спортчылар 2022 елгы дөнья беренчелегендә Россия җыелма командасы составына эләгәчәк.