Татарстан һәм Төркмәнстанның спорт вузлары хезмәттәшлек турында меморандумга кул куйдылар
Идел буе дәүләт физик культура, спорт һәм туризм университеты һәм Төркмән дәүләт физик культура һәм спорт институты хезмәттәшлек турында меморандумга кул куйдылар.
Документ академцияләр үткәрү өчен укытучылар, шулай ук уку һәм стажировка өчен студентлар һәм аспирантлар белән академик алмашуны күздә тота. Моннан тыш, уртак фәнни-тикшеренү проектларын гамәлгә ашыру, фәнни һәм белем бирү конференцияләрендә, семинарларында катнашу һәм спортның төрле төрләре буенча спорт очрашулары үткәрү планлаштырыла.
Идел буе дәүләт физик культура, спорт һәм туризм университетының фәнни эш һәм халыкара эшчәнлек буенча проректоры Андрей Назаренко сүзләренчә, меморандумга кул кую югары уку йортларының ике яклы мөнәсәбәтләрен үстерүгә яңа импульс бирәчәк.
Югары уку йортлары арасында мәгариф, фәнни, тәрбия һәм спорт эшчәнлегендә халыкара хезмәттәшлек киңәйтеләчәк, шулай ук яңа методикалар һәм эшләнмәләр кертү өчен мөмкинлекләр барлыкка киләчәк, - диде Назаренко.
Төркмән дәүләт физик культура һәм спорт институтында 3 факультет һәм 13 кафедра эшли, укыту 8 белгечлек буенча алып барыла. Югары уку йортында 46 спорт төре буенча тренерлар әзерлиләр. Институт студент-спортчылары дөнья чемпионатларында, югары дәрәҗәдәге халыкара ярышларда чыгыш ясыйлар, призлы урыннар яулыйлар. Югары уку йортын тәмамлаучылар һәм студентлар арасында исемнәре алтын хәрефләр белән төркмән спорты тарихына кертелгән спортчылар күп.