Казанда СССР спорт мастеры Шамил Ганиев истәлегенә ирекле көрәш буенча 17 нче ачык республика турниры старт ала
1 декабрьдә егетләр һәм кызлар арасында ирекле көрәш буенча СССР спорт мастеры Шамил Ганиевич Ганиев истәлегенә багышланган XVII ачык республика турнирын ачу тантанасы була. Ярышлар «Ракета» спорт комплексында узачак һәм Россиянең 10 төбәгеннән 100дән артык спортчы җыелачак.
Турнирны ачу тантанасында ТР Спорт көрәше федерациясе президенты, «Татарстан Республикасы Муниципаль берәмлекләр Советы» Ассоциациясе рәисе Экзам Гобәйдуллин, ТР Дәүләт Советы депутаты Светлана Вострикова, Казанның спорт комитеты вәкилләре, спонсорлар катнашачак. Шулай ук тантанага ирекле көрәш ветераннары чакырылган.
Ш.Г. Ганиев истәлегенә ирекле көрәш буенча 17 нче еллык ачык турнир Казанда 30 ноябрьдән 2 декабрьгә кадәр уза. Анда Мәскәү, Пермь крае, Чуваш, Удмурт республикалары, Самар, Ульяновск, Түбән Новгород, Пенза өлкәләреннән 100дән артык егет һәм кыз катнаша. Татарстаннан Түбән Кама, Зәй, Чаллы, Мамадыш, Тәтеш, Менделеевск, Бай Саба, Казан һәм башка шәһәрләрдән яшь көрәшчеләр килә.
Егетләр 13 үлчәү категориясендә, кызлар ике үлчәү категориясендә ярыша. Ярышларның баш судьясы Марат .ин. Турнир җиңүчеләрен һәм призерларын Казанның Физик культура һәм спорт комитетыннан истәлекле медальләр, дипломнар һәм акчалата призлар, шулай ук спонсорлар бүләкләячәк.
Шамил Ганиевич СССРның спорт мастеры исеменә ия була, берничә тапкыр ТР чемпионы, дүрт тапкыр Россия зонасы (Волга буе) чемпионы, РСФСР чемпионатының, ВЦСПС, Мәскәү Спартакиадасының бронза призеры, Зенит Үзәк спорт клубы чемпионы була. Аның истәлегенә Турнир Татарстанда ирекле көрәшне популярлаштыру, шулай ук спорт осталыгын арттыру, яшүсмерләрне һәм яшьләрне спорт белән системалы шөгыльләнүгә җәлеп итү, сәламәт яшәү рәвешен пропагандалау максатларында үткәрелә.