Казанда олимпия уеннары артефактларының уникаль күргәзмәсе ачылды
11 июньдә Татарстан Республикасы Милли китапханәсендә «Олимпны яулаучылар. Владимир Потанин коллекциясеннән артефактлар күргәзмәсе» ачылды. Ул Казанда 12 июньдә башланачак 2024 елгы БРИКС илләре уеннарын уздыруга багышланган.
Тәкъдим ителгән коллекция, заманның беренче уеннарыннан башлап, олимпиада артефактларының дөньяда иң зур гавами шәхси җыентыкларының берсе булып тора. Аңа йөзләгән предмет, шул исәптән бүләкләү һәм истәлекле медальләр, факеллар, дипломнар, кубоклар һәм башкалар керә.
Күргәзмәне Россия Халыкара Олимпия университеты һәм Татарстан Республикасы спорт министрлыгы оештырды. Ачылу тантанасында РФ премьер-министрының штаттан тыш киңәшчесе Олег Матыцин, «Россия Халыкара Олимпия университеты» өстәмә һөнәри белем бирү оешмасы ректоры Лев Белоусов һәм суга сикерү буенча олимпия чемпионы Илья Захаров катнашты.
«Күргәзмәне оештыручыларга, Владимир Олег улы Потанинга гаҗәеп бүләк өчен рәхмәтлемен, аның ярдәмендә кешеләр безнең бөек тарихыбызга катнашы барлыгын тоялар, - дип билгеләп үтте Олег Матыцин. - Бу күргәзмә – шул исәптән мәгариф күргәзмәсе дә, чөнки спорт үзендә фәнне дә, сәнгатьне дә, мәдәниятне дә берләштерә. Ул спортны һәм төрле яктан атлетларның казанышларын күз алдына китерергә мөмкинлек бирә. Хәзер россиялеләрнең һәм безнең кунакларның тарихка кагылу һәм төрле илләр спортчыларының казанышларын искә төшерү мөмкинлеге барлыкка килде».
Күргәзмәне эшләгәндә төп игътибар Россия спортчыларының, шул исәптән Татарстаннан килгән спортчыларның уңышларына юнәлтелгән. Әйтик, спортның яңа тарихы секциясендә парлы фигуралы шуу буенча Олимпия уеннарының ике тапкыр призеры Евгения Тарасованың шәхси медальләре тәкъдим ителгән.
«Бу күргәзмә илебезнең барлык спорт өлешенең нигезе булып тора, - диде Илья Захаров. - Мин инде экспонатларны карарга өлгердем һәм тарихыбызның никадәр киң булуын аңладым. Бу хакта спорт белән мавыгучы барлык кешеләргә сөйләргә кирәк. Спорттагы казанышларыбыз тарихына карап, безне дөньядагы иң көчле держава дип горурланып әйтергә була. БРИКС уеннары алдыннан моны башка илләрдән килгән кунаклар да беләчәк. Алар безнең илнең нәрсәгә ирешүенә гаҗәпләнәчәкләр һәм моңа ирешергә омтылачаклар».
Күргәзмәдә архив фотосурәтләре һәм видеохроникалар легендар җиңүләр тарихын сурәтли, ә уеннарда катнашучыларның медальләрендәге һәм дипломнарындагы антик рәсемнәр заманча нейротехнологияләр ярдәмендә җанландырылган.
«Әгәр сез узган гасырда башланган Олимпия уеннары тарихын күрергә телисез икән, коллекцияне карарга килегез, - дип чакырды Лев Белоусов. - Бездә Олимпия уеннары артефактлары бар, һәм бу бердәнбер артефактлар түгел, ә кагыйдә буларак, Пьер де Кубертен заманнарыннан башлап бүләк һәм бүләкләү медальләренең тулы комплектлары. Уникаль документлар – дипломнар, шулай ук факеллар һәм кубоклар. Барлыгы 400 артефакт. Бу декоратив-гамәли сәнгать коллекциясе һәм технологияләр үсешенең чагылышы».
Экспозициягә танылган татар стрит-арт рәссамы Рөстәм Qbicның «Олимпка кадәр барып җитү» арт-объекты өстәлгән, ул Милли китапханә фасады каршындагы яр буенда урнаштырылган.
Күргәзмә БРИКС илләре уеннарының мәдәни программасына кертелгән һәм җәй буе эшләячәк. Барлык теләүчеләр өчен дә керү бушлай.