«Свияга» ату мәйданчыгында стендка ату буенча Россия укучылары Спартакиадасы старт ала
31 августта Татарстанның Югары Ослан районындагы «Свияга» ату мәйданчыгында стендка ату буенча Россия укучылары Спартакиадасы финалына тантаналы рәвештә старт бирелде.
Ачылу тантанасында командалар вәкилләре һәм тренерлары, яшь спортчылар, шулай ук мәртәбәле кунаклар катнашты. Сәламләү сүзләре белән ТР Спорт министрлыгының Спорт әзерлеге үзәге директоры Альберт Баһаветдинов, Иннополис шәһәре Мэры Дмитрий Вандюков, ТР Югары Ослан районы администрациясе башлыгы урынбасары Сергей Осянин, ТР пуля һәм стендка ату федерациясе Президенты Сергей Демин һәм беренче вице-президент Фиргать Җиһаншин чыгыш ясады.
Якындагы 5 көн эчендә яшь стендчылар трапта һәм скитта 6 комплект бүләк уйнатачак. Турнирда катнашу өчен илнең 14 төбәгеннән 66 спортчы килгән.
Беренче булып стартка «траншейниклар» чыгачак. Инде 2 сентябрьдә үк алар шәхси зачетта беренче җиңүчеләрне һәм призерларны билгеләячәкләр. Аннары эстафетаны түгәрәк стендта чыгыш ясаучы укчылар кабул итәчәк. Алар микстта бүләкләрнең йомгаклау комплектын уйнатачак.
Белешмә өчен:
Россия укучылары Спартакиадасы – яшь спортчылар өчен даими үткәрелә торган комплекслы мультиспорт турниры. Быел ярышлар 16 спорт төре буенча уздырыла, шул исәптән стендка һәм пуля белән ату буенча.