Казан кышкы спорт төрләре буенча Махсус Олимпиаданың Бөтенроссия спартакиадасын кабул итә
2025 елның 3 мартыннан 7 мартына кадәр Татарстан Республикасы башкаласы Бөтенроссия спорт вакыйгасын — Махсус Олимпиада Спартакиадасын үткәрү үзәгенә әвереләчәк. Ярышлар дүрт спорт төре буенча узачак: кар баскычында йөгерү, чаңгы узышлары, флорбол һәм юнифайд-флорбол. Оештыручылар булып «Россиянең Махсус Олимпиадасы» төбәк оешмасы белән берлектә РФ спорт министрлыгы, ТР Спорт министрлыгы, ТР Мәгариф министрлыгы тора.
Стартка илнең 25 төбәгеннән 550ләп спортчы чыгачак, алар арасында менталь үсеш үзенчәлекләре булган 430 катнашучы бар. Татарстан Республикасын программаның барлык төрләрендә 127 кешедән торган команда тәкъдим итәчәк.
Спортчылар үзләренең көчләрен, чыдамлыкларын һәм осталыкларын шәһәрнең иң яхшы спорт объектларында күрсәтә алачак. Чаралар «Буревестник» һәм «Локомотив» стадионнарында, шулай ук Бокс һәм өстәл теннисы үзәгендә узачак.
Инклюзивлыкка аерым игътибар бирелә: ярышларда катнашучылар үзләренең казанышларын күрсәтеп кенә калмыйча, физик мөмкинлекләренә карамастан, тәҗрибә уртаклашу һәм дуслык өчен уникаль мөмкинлек тә алачаклар.