Яшьләр хәрәкәте лидерлары ГТО нормативларын үтәделәр
25 апрельдә Казанның «Буревестник» спорт комплексы стадионында Татарстан Республикасы яшьләр хәрәкәте лидерлары ГТО нормативларын тапшырдылар. Чара Россиянең милли проектларының «Физик культура һәм спортны үстерү» дәүләт программасын гамәлгә ашыру кысаларында уздырылды һәм Бөек Ватан сугышында Җиңү еллыгына багышланды.
Нормативларны үтәүдә студентлар, ТР Яшьләр хөкүмәте һәм Студентлар лигасы әгъзалары катнашты. Катнашучыларны ГТО төбәк оешмасы рәисе Эдуард Иванов, Идел буе университетының административ эш һәм яшьләр сәясәте буенча проректоры Наталья Гречанникова, Татарстан Республикасы Студентлар лигасы президенты Шамил Якупов һәм Татарстан Республикасы Яшьләр хөкүмәте рәисе вазыйфаларын башкаручы Андрей Шишов сәламләде.
Әлеге чараны уздыруның мөһимлеген Эдуард Иванов билгеләп үтте. Ул нәкъ менә лидерларның үз үрнәкләрендә физик активлык һәм сәламәт яшәү рәвеше мөһимлеген күрсәтүләре турында әйтте.
«Монда студентлар хәрәкәте лидерлары җыелды, бик күп нәрсә сездән тора. Үзегезнең үрнәгегез белән сез сәламәт яшәү рәвешенә һәм шәхеснең гармонияле үсешенә бирелгәнлегегезне күрсәтәсез, чөнки ГТО – физик сәламәтлек турында гына түгел, ә рухи сәламәтлек турында да. Безнең белән булуыгыз өчен рәхмәт сезгә».
Тантаналы өлештән соң катнашучылар өчен разминка үткәрелде, һәм алар нормативлар тапшырырга киттеләр. Сынаулар исемлегендә йөгерү, тартылу, алга авышу һәм кулларны бөгү/җәю нормативлары бар иде.
Шамил Якупов нормативларны үтәү тәҗрибәсе белән уртаклашты. Ул мәктәп һәм студент елларында нормативларны күп тапкырлар үтәвен һәм алтын билгегә кадәр аңа 3 км га йөгерүдә нәтиҗәләр җитмәвен әйтте. Бүген ул бу нормативны яуларга ниятли.