VK Festта Казанда ГТО мәйданчыгы эшләячәк
29 июньдә Татарстан башкаласында «Казан» гаилә үзәге янында беренче тапкыр VKFest музыка фестивале узачак. Фестивальдә катнашучыларның берсе ГТО Бөтенроссия физкультура-спорт комплексының төбәк бүлеге булачак.
Фестиваль кунаклары өчен махсус мәйданчык әзерләделәр, анда һәркем, ГТО комплексының төрле физик сынауларын үтәп, үз көчен һәм чыдамлыгын тикшерә алачак. Моннан тыш, бирегә килүчеләр комплексның яшь баскычлары белән танышачаклар, гамәлдәге спорт дисциплиналары һәм нормаларның һәр дәрәҗәсендәге таләпләр турында күбрәк беләчәкләр.
Нормативларны VKFest ка тапшырырга теләүчеләр үзләре белән медицина белешмәсен алып килергә тиеш, бәйрәмнең калган кунакларына тест үзәге хезмәткәрләре нормативларны үтәүгә алар өчен уңайлы датага язылырга тәкъдим итәчәк.
Әйтергә кирәк, ГТО комплексы чарасы «Россия спорты» дәүләт программасын гамәлгә ашыру кысаларында уздырыла, ил халкын физик культура һәм спорт белән системалы шөгыльләнүгә җәлеп итә.
VKFest-ачык һавадагы музыкаль-күңел ачу фестивале, ул ел саен Россиянең эре шәһәрләрендә уза. Быел фестиваль беренче тапкыр Казанда узачак. Татарстан башкаласында яшәүчеләр һәм кунаклар өчен мәйданчыкта танылган башкаручылар, блогерлар чыгыш ясаячак. Моннан тыш, оештыручылар бөтен гаилә өчен лекцияләр, мастер-класслар, конкурслар һәм башка активлыклар әзерләделәр.
Фестивальгә керү түләүле. Билетларны сайтта сатып алырга мөмкин vkfest.ru