Казанда шашка буенча Идел буе федераль округы чемпионаты һәм беренчелеге башланды
8 августта Р.Г. Нәҗметдинов исемендәге олимпия резервы Республика спорт мәктәбендә ир-атлар һәм хатын-кызлар арасында Идел буе федераль округы чемпионатын һәм рус һәм йөзклеткалы шашка буенча 9, 11, 14, 17, 20 һәм 27 яшькә кадәрге Идел буе федераль округы беренчелеген ачу тантанасы булды.
Тантанада Татарстан Республикасы шашка федерациясе рәисе, Россиянең спорт мастеры Сергей Степанов, дөнья, Европа һәм Россия чемпионы, халыкара гроссмейстер Дмитрий Цинман, ярышларның баш хөкемдары, бөтенроссия категориясе спорт хөкемдары Сергей Кириллов (Түбән Новгород шәһәре), шулай ук музыкантлар — бөтенроссия һәм халыкара конкурслар лауреатлары катнашты.
17 августка кадәр дәвам итәчәк ярышларда рекордлы санда шашкачылар катнаша — Идел буе федераль округы составына керүче 14 регионнан 232се. Барлыгы 70 комплект медаль уйнатылачак.