Россия Генераль прокуроры Игорь Краснов һәм Рөстәм Миңнеханов Казанда уктан ату үзәге төзелешенә старт бирделәр
Бүген Казанда масштаблы проектны - уктан ату буенча махсуслаштырылган үзәк төзелешен гамәлгә ашыруга старт бирелде.
Чара шәһәрнең һәм республиканың спорт инфраструктурасын үстерүдә мөһим этап булып тора. Стартны Россиянең Генераль прокуроры Игорь Краснов һәм Татарстан рәисе Рөстәм Миңнеханов бирде.
Яңа спорт комплексы Казандагы «Тасма» олимпия резервы мәктәбе территориясендә урнашачак. Бүген әлеге спорт объекты базасында 93 укчы спортчы шөгыльләнә.
Уктан ату бүлеге спорт мәктәбе базасында 2009 елдан бирле эшли һәм Татарстан Республикасы территориясендә спортчыларны әзерләү өчен бердәнбер мәйданчык булып тора.
Яңа уктан ату үзәге профессиональ спортчыларны да, спортның бу төрен яратучыларны да әзерләү өчен билгеләнгән. Ул иң югары дәрәҗәдәге тренировкалар һәм ярышлар уздыру өчен барлык заманча таләпләргә җавап бирәчәк, ә аның техник мөмкинлекләре берьюлы 160 укчыны әзерләргә мөмкинлек бирәчәк.
Спорт зонасы 70 метрга кадәр дистанцияләрдә ату өчен каралган. Тамашачылар өчен 200 урынга исәпләнгән мобиль трибуналар, ә спортчылар өчен сигез җиһазландырылган чишенү бүлмәсе каралачак.
Төзелеш башлану тантанасында Игорь Краснов яңа спорт объекты балалар һәм яшьләр өчен генә түгел, ә аларның ата-аналары, барлык гражданнар өчен дә тарту ноктасы булачагына ышаныч белдерде. "Сезгә укларыгызның үзегез билгеләгән юнәлештә хәрәкәт итүен телим! Һәрвакыт "унлыкка" эләксеннәр! Хәерле юлга", - дип теләде барысына да Россия Генераль прокуроры.
Татарстан рәисе Рөстәм Миңнеханов сәламләү сүзендә билгеләп үткәнчә, бүген барысы да монда, тарихи урында, «Тасма» стадионы янында мөһим проектка – заманча уктан ату үзәген төзүгә старт бирү өчен җыелган. «Безнең бурыч-Татарстан Республикасы көненә, 30 августка объектны файдалануга тапшыру, - диде Рөстәм Миңнеханов. – Безнең балалар, яшьләр, традицион спорт төрләре белән шөгыльләнсеннәр өчен».
Рөстәм Миңнеханов Игорь Красновка Казанга килүе өчен рәхмәт белдерде – барыннан да элек, яңа үзәк төзелешен башлау графигында катнашырга вакыт тапканы өчен, шулай ук Россия Генераль прокурорының уктан ату буенча «Россия Федерациясе Генераль прокуроры Кубогы» IV Бөтенроссия ярышларын ачуда катнашуы өчен ( 22-26 сентябрь, Казан, «Ак Барс Арена»стадионы).
Рөстәм Миңнеханов спортчыларга уңышлар теләде-актив шөгыльләнергә һәм тырышып эшләргә, ярышларда беренче урыннарны алырга һәм иң яхшылары булырга.
Яңа үзәк югары дәрәҗәдәге уникаль махсуслаштырылган мәйданчык булачак, барлык халыкара стандартларга җавап бирәчәк һәм спортчыларга ярышларга уңышлы әзерләнергә мөмкинлек бирәчәк дип көтелә.