Казанда Россиядә беренче тапкыр киокусинкай буенча дөнья Кубогы старт ала
21 илдән 500 дән артык спортчы дәрәҗәле турнир бүләкләре өчен көрәшәчәк.
1 ноябрь
Татарстан башкаласында зур спорт вакыйгасы – киокусинкай буенча дөнья Кубогы башлана. Әлеге спорт төрендә мондый югары статустагы турнир беренче мәртәбә Россия Федерациясе территориясендә уза. Ярышларны «Бокс һәм өстәл теннисы үзәге» спорт комплексы заллары кабул итәчәк (Фәйзи ур., 2-а).
Турнирда 21 илдән, шул исәптән Абхазия, Әрмәнстан, Беларусь, Болгария, Иран, Казахстан, Кытай, Колумбия, Россия, Төркия, Үзбәкстан һәм башка илләрдән 500 гә якын иң көчле көрәшче катнашты. Спортчылар ир-атлар һәм хатын-кызлар арасында «кекусин-ката», «кекусин – ката-группа» һәм «кекусин-авырлык категориясе» дисциплиналарында көч сынашачак.
Дөнья Кубогы белән беррәттән 12-13, 14-15 һәм 16-17 яшьтәге яшь спортчылар арасында «Казан барсы» халыкара ярышлары да узачак.
Чаралар программасы:
31 октябрь: катнашучылар килү, мандат комиссиясе эше һәм судьялар семинары.
1 ноябрь: Дөнья кубогының төп көне. Иртәдән тамашачылар «ката» дисциплинасында тамашалы чыгышлар күрәчәк, ә төштән соң үлчәү категорияләрендә беренчел көрәшләр башланачак. Көн тантаналы ачылыш, финал сугышлары һәм җиңүчеләрне бүләкләү белән тәмамланачак.
2 ноябрь: Эстафетаны «Казан барсы»турниры кысаларында медаль өчен көрәшәчәк егетләр һәм кызлар кабул итәчәк.
Казанда дөнья кубогын уздыру шәһәрнең Россиянең спорт башкаласы һәм дөнья дәрәҗәсендәге киокусинкай үсеш үзәге статусын ассызыклый. Моңа кадәр төрле илләрдә дөнья һәм Европа чемпионатлары уздырылган иде, әмма дөнья Кубогы Россия җирендә беренче тапкыр узачак.