Азнакайда сезонны ябу кысаларында чаңгы ярышлары узды
14 мартта Азнакайдагы чаңгы базасында чаңгы сезоны ябылуга багышланган чаңгы ярышлары узды. Турнирда шәһәр һәм Азнакай муниципаль районы гомуми белем бирү учреждениеләренең тугыз командасыннан 48 укучы катнашты.
Спортчылар дүрт яшь төркемендә көч сынаштылар: 2008-2009, 2010-2011, 2012-2013, 2014 елгы һәм аннан яшьрәк егетләр һәм кызлар. Чыгышларның нәтиҗәләре чаңгыда йөгерү буенча «Хезмәткә һәм оборонага әзер» Бөтенроссия физкультура-спорт комплексы нормативын үтәү кысаларында исәпкә алынды.
Катнашучыларга сәламләү сүзе белән Азнакай муниципаль районы башлыгы урынбасары Айдар Хәлиуллин һәм район башкарма комитетының Физик культура һәм спорт идарәсе җитәкчесе Рәфис Миңнеханов мөрәҗәгать итте.
Шәхси зачетта Эльяна Гайсина, Раид Гыймранов, Элина Ягудина, Морат Халиков, Аделя Халикова, Камил Хәкимов һәм Ислам Шәрәфиев җиңүчеләр булдылар. «Иң яшь катнашучы» номинациясендә 4 нче лицейдан Руслан Габдуллин бүләкләнде.
Гомумкоманда зачетында беренче урынны Актүбә бистәсенең 1 нче мәктәбе, икенче урынны Азнакай шәһәренең 8 нче мәктәбе, өченче урынны Азнакай шәһәренең 6 нчы мәктәбе алды. Җиңүче команданың тренеры Сергей Соколовка «җиңүче Тренер»Кубогы бирелде.
Ярышларны уздыру «Россия спорты» дәүләт программасы максатларына туры килә, ул балаларны һәм яшүсмерләрне системалы рәвештә физик культура белән шөгыльләнүгә җәлеп итүгә һәм ГТО комплексын популярлаштыруга юнәлдерелгән.