Юность спорт мәктәбе волейболчылары кызлар арасында Татарстан беренчелеген отты
Казанда Үзәк стадион мәйданчыгында «А»төркемендә 2010-2011 елгы кызлар арасында волейбол буенча Татарстан Республикасы беренчелеге тәмамланды. Турнирның җиңүчесе Казанның «Юность»урта мәктәбе командасы булды.
Ярышлар каты көрәштә узды, күп матчларның нәтиҗәсе тай-брейкта хәл ителде. Уеннар нәтиҗәләре буенча алтын медальләрне тренер Марина Трапезникова җитәкчелегендәге «Юность» олимпия резервы спорт мәктәбе укучылары яулады. Яр Чаллыдан СШ-11 командасы (тренеры Александр Афанасьев) көмеш призер булды. Өченче урынны Кукмара районы җыелма командасы алды (тренеры Айрат Вахитов).
Тантаналы ачылышта республика физкультура һәм яшүсмерләр спорты үзәге директоры Мөнирә Рәхмәтуллина, ТР Волейбол федерациясе башкарма директоры Мансур Кәримов, «Юность» урта гомуми белем бирү мәктәбе директоры, ТР Волейбол федерациясе балалар волейболы комитеты рәисе Рәфыйк Мурзаков, шулай ук ярышларның баш хөкемдары Алексей Оощников катнашты.
Призлы командалар кубоклар һәм дипломнар, ә уенчылар медальләр һәм грамоталар белән бүләкләнде.