2013 елгы Универсиаданы оештыручылар FISU Башкарма комитетында беренчел хисап тоттылар. 2нче өлеш

Гадәткә кергәнчә, «Казан 2013» оештыру комитеты хисап тотканчы, Казанда узган Универсиада нәтиҗәләре буенча FISUның тѳрле юнәлештәге комитетлары вәкилләре үз хисапларын тәкъдим иттеләр. Барлык комитетларның да җитәкчеләре һичшиксез FISU тарихына кереп калачак статистик күрсәткечләрнең югары булуын, чараның сыйфатлы оештырылуын, «Казан 2013» командасының тиңдәшсез команда рухын һәм югары результатларга йѳз тотып эш итүен, шулай ук Казандагы Уеннар вакытында Универсиадалар уздыру тәҗрибәсендә киләчәктә дә файдалану хуплана торган бик күп яңалыклар кертелүен билгеләп үттеләр. FISU Казандагы Халыкара уку-укыту үзәгенә дә мѳһим роль бирә, ул киләчәктәге Уеннарның Оештыру комитетлары ѳчен белемнәр тапшыру үзәгенә әверелергә тиеш.