Сочида XI кышкы Паралимпия уеннары старт ала

Паралимпиадада 45 илдән 575 спортчы катнашачак, алар спортның 5 төре: тау чаңгысы спорты, биатлон, чаңгы ярышы, бозда следж-хоккей һәм коляскада керлинг - буенча 72 комплект медаль уйнатачак. Шулай ук Паралимпия хәрәкәте тарихында беренче тапкыр Сочида пара-сноуборд буенча ярышлар була.

Россия исеменнән Паралимпиадада РФнең 17 субъектыннан 78 спортчы катнаша, шул исәптән, икесе Татарстаннан: Марта Зәйнуллина һәм Рушан Миңнегулов. Тулаем алганда, Россия делегациясе составында 195 кеше була.

Паралимпиаданы ачу тантанасы бүген сәгать 20.00 “Фишт” стадионында башлана. Тантанада Россия җыелма командасы исеменнән байракны Россиянең спорт мастеры, күрмәүчеләр арасында тау чаңгысы спорты буенча дөнья чемпионатының бронза призеры, 2012-2013 еллар дөнья Кубогы иясе, дөнья һәм Европа Кубоклары призеры, күп тапкыр Россия чемпионы Валерий Редкозубов алып барачак.

Паралимпаданы ачу тантанасының туры трансляциясен "Беренче канал"да карап булачак.