Казанда регби-7 буенча Европа Гран-При сериясе этабы матчларына керү бушлай булачак
Татарстан башкаласы быел хатын-кызлар командалары арасында регби-7 буенча Европа гран-при сериясе этабын бишенче тапкыр кабул итәргә әзерләнә. Европа чемпионкалары титулын саклап калырга омтылучы Россия командасына теләгән һәркем көч биреп тора ала – турнир матчларына керү бушлай булачак. Ярышлар 1 нче һәм 2 нче сентябрь көннәрендә Үзәк стадионда уза.
1 нче сентябрьдә матчлар 10.00 сәгатьтә башлана: көн программасын Франция һәм Германия җыелма командалары арасындагы ярыш ачып җибәрәчәк. Гомумән алганда көн дәвамында һәр команда өчәр матч уздырачак: мисалга, Россия кызлары Португалия, Шотландия һәм Уэльс командаларына каршы уйнаячаклар.
Турнирның икенче көнендә җанатарлар плей-офф матчларын карап хозурлана алачаклар - уеннар бу көнне дә 10.00 сәгатьтә башлана. Икенче ярышлар көне нәтиҗәләре буенча Казан этабының һәм бөтен Европа гран-при сериясенең җиңүчеләре билгеле булачак.