Рөстәм Миңнеханов Республика балалар клиник хастаханәсенең онкогематология бүлеге пациентлары - балалар белән аралашты

 Бүген Татарстан Республикасы Президенты Рөстәм Миңнеханов Республика балалар клиник хастаханәсенең онкогематология бүлегендә дәваланучы балалар белән очрашты.
Очрашу 1 июнь – Халыкара балаларны яклау көне кысаларында үтте.
Балалар өчен Казан Кремле, Кол Шәриф мәчете, Благовещение соборы, Сөембикә манарасы буйлап экскурсия оештырылды.
Рөстәм Миңнеханов экскурсиягә Губернатор сарае янындагы күзәтү мәйданында кушылды. Ул балалар белән төрле темаларга сөйләште, нәрсә белән кызыксынуларын, Казан турында ниләр белүләрен сорашты.
Соңыннан республика башлыгы кунакларны хәзерге вакытта Татарстан Президентының рәсми резиденциясе булган Губернатор сараена чакырды.
Балаларны Губернатор сарае буйлап йөрттеләр, традицион рәвештә бүләкләү тантанасы үтә торган Ак залны, Камин залын, шулай ук Татарстан Президентының эш кабинетын күрсәттеләр.
Рөстәм Миңнеханов яшь кунакларга үзенең эш көне ничек үтүен һәм Губернатор сараенда нинди кешеләрне кабул итүен сөйләде.
Ул Губернатор сарае эш бүлмәләре буйлап мондый экскурсиянең беренче тапкыр үтүенә ачыклык кертте. “Сез бүген монда төп кешеләр булганлыктан, барысын да карый, бөтен җиргә керә аласыз”, - диде Рөстәм Миңнеханов.
Балалар экскурсия вакытында Рөстәм Миңнеханов белән фотога төштеләр, аңа бик күп сораулар бирделәр. Кунаклар республика башлыгы кабинетында аның эш өстәле артында утырдылар, берничәсе “Президент” ручкасы белән кәгазьдә кулын куйды һәм азга гына булса да үзен Президент итеп хис итте.
Залларның берсендә күмәк фотога төштеләр.
Соңыннан Рөстәм Миңнеханов үзенең кунакларына бүләкләр – электрон китаплар һәм “Казан Кремле” музей-тыюлыгы турында фотоальбомнар тапшырды. Балаларны озата баручы табиблар, үзен начар хис иткәнгә күрә, катнашучыларның берсе бүген Казан Кремленә килә алмавын хәбәр иттеләр. Аңа да республика башлыгы Халыкара балаларны яклау көне уңаеннан бүләк бирде.
Моннан тыш, Рөстәм Миңнеханов ТР Президентының социаль мәсьәләләр буенча ярдәмчесе Татьяна Ларионовага һәм ТР Президенты Эшләр идарәчесе Мөслих Ситдыйковка бүгенге көндә Республика балалар клиник хастаханәсенең онкогематология бүлегендә дәваланучы барлык балаларга (барлыгы 40ка якын) Халыкара балаларны яклау көне уңаеннан бүләкләр тапшырырга кушты.
Рөстәм Миңнеханов кунакларына тизрәк савыгуларын теләде, ә балалар, үз чиратында, аңа бүләк - Диана Кулимуллина бисердан әзерләгән панно тапшырдылар. Кыз, авыруы аркасында уң кулы булмаса да, кул эшләре белән кызыксына. Рөстәм Миңнеханов бүләк өчен чын күңелдән рәхмәтен белдерде һәм панноны аңлатма язуы белән Губернатор сараеның бер бүлмәсенә урнаштырырга вәгъдә итте.
Соңыннан кунаклар “Кремль” кафесына бәйрәм табынына киттеләр, ә Татарстан Президенты – Мәскәү белән видеоконференция элемтәсе сеансына, анда республикадан балалар җыелма командасы җиңүчеләрнең өченче Бөтендөнья балалар Уеннарында катнаша (2012 елның 31 маеннан 2 июненә кадәр). Бу - ракны җиңгән балалар өчен уникаль спорт ярышы. “Җиңүчеләрнең уеннары” – онкология авыруларын кичергән балалар өчен дөньяда иң зур ярышлар, дип хәбәр итә ТР Президенты матбугат хезмәте.