Казанда Бадминтон‑2023 буенча Россия Кубогына йомгак ясадылар
30 апрельдә Казанда Бадминтон‑2023 буенча Россия Кубогы тәмамланды. Илнең 14 төбәгеннән 140тан артык иң көчле бадминтончы чемпион исеме өчен көрәшергә җыелды.
Турнирның төрле категорияләрендә ир-атлар һәм хатын-кызлар ялгыз разрядларында, ир-атлар һәм хатын-кызлар парлы разрядларында һәм катнаш парлы разрядта иң яхшыларны ачыклау өчен яхшы мөмкинлек бирүче биш бүләк комплекты уйнатылды.
Хатын-кызлар ялгыз разряды финалында Татарстан Республикасыннан Евгения Косецкая ышанычлы җиңү яулады, ул Мәскәүдән Елена Комендровская белән матчта югары дәрәҗәдәге уен күрсәтте һәм 21-10, 21-10 исәбе белән җиңде. Бу җиңү Евгения Косецкая өчен Россия Кубогында хатын-кызлар ялгыз разрядында җиденче җиңү була.
Хатын-кызлар парлы разрядында Татарстан Республикасыннан Евгения Косецкая һәм Анастасия Редькина Санкт-Петербургтан Анастасия Боярун һәм Алена Яковлева белән көрәштә 21-16, 16-21, 21-14 исәбе белән җиңү яуладылар.
Ир-атлар ялгыз разрядында Мәскәүдән Георгий Карпов Татарстан Республикасыннан Сергей Сирантны 21-23, 21-16, 21-14 исәбе белән җиңде. Бу матч узган елгы Кубок финалы өчен истәлекле реванш булды.
Ир-атлар арасында парлы разрядта алтынны Мәскәүдән Александр Зинченко һәм Никита Хәкимов дуэты яулый, алар киеренке матчта Мәскәү өлкәсеннән Егор Борисов һәм Георгий Лебедевны 19-21, 21-18, 21-6 исәбе белән җиңәләр.
Катнаш парлы разрядта узган елгы җиңүчеләр Родион Алимов һәм Алина Дәүләтова, финалда Мәскәү өлкәсеннән Егор Борисов һәм Екатерина Малькованы 21-8, 21-14 исәбе белән җиңеп, үз өстенлекләрен дәвам иттеләр.