Казанда беренче мәртәбә студентлар командалары арасында хоккей буенча «СтудМир» халыкара турниры узачак
22-25 май көннәрендә Татарстан Республикасында беренче тапкыр алкалы хоккей буенча «СтудМир» Халыкара студентлар турниры узачак. Хоккей коллективлары арасындагы ярышларны чыннан да уникаль дип атарга була, чөнки ул Россия һәм чит илләрнең югары уку йортларыннан һәм көллиятләреннән иң яхшы уенчыларны җыячак.
Турнирның беренче елында ук катнашучылар географиясе киңәйде. Татарстан Республикасыннан, Тверь, Мәскәү, Томск өлкәләреннән, Санкт-Петербургтан 8 команда, шулай ук Кытай Халык Республикасының студентлар җыелма командасы үзләренең катнашуларын раслады. Татарстан Республикасыннан 2 команда чыгыш ясаячак.
Турнирда барлыгы 200 спортчы катнашачак. Матчлар Казан Спорт сарае базасында (Мәскәү ур., 1) узачак.
Татарстан Республикасы Хоккей федерациясе вице-президенты, Андрей Рябов:
«Узган ел без Татарстанда студентлар хоккее үсеш авангардында булсын өчен планлы эш башладык. Татарстан Республикасының хоккей федерациясе президенты Наил Өлфәт улы Маганов ярдәме белән без, ниһаять, инициативаны туктаусыз күчердек һәм уртак тырышлык белән республикада студентлар хоккеен алга этәрә башладык. Минемчә, «СтудМир» турниры туу идеясе — студентлар хоккеен популярлаштыруга башлангыч нокта, чөнки үсешнең бу өлешендә потенциал бик зур».
Студентлар Хоккей Лигасы Директоры, Антон Храмцов:
«Җыелма командалар арасында масштаблы турнир уздыру идеясе сезон башланыр алдыннан туды. Россия субъектлары базасында студентлар җыелма командаларын формалаштыру — студентлар хоккеен алга таба үстерү өчен тагын бер мөһим адым һәм аны популярлаштыруның төп трендларының берсе, дип саныйм.
Безнең чакыруны Яньтай университеты командасы кабул итүе аеруча күңелле. Безнең Кытай Халык Республикасы белән хезмәттәшлегебез үсүен дәвам итә. Ышанам ки, турнирда Кытай командасының катнашуы турнирга өстәмә кызыксыну уятачак һәм безнең Кытай партнерлары белән киләчәк багланышларны ныгытачак».
«СтудМира»ны ачу тантанасы 22 майда 18:00 сәгатьтә була.