Дмитрий Чернышенко: БРИКС илләре уеннарында катнашуларын инде 97 ил раслады
Хөкүмәт Рәисе урынбасары Дмитрий Чернышенко БРИКС илләренең спорт уеннарына әзерлек һәм аларны үткәрү буенча оештыру комитеты утырышын уздырды. Уеннар 12 июньнән 23 июньгә кадәр Казанда узачак. Киңәшмәдә шулай ук Президент киңәшчесе Игорь Левитин, спорт министры урынбасары Алексей Морозов, Татарстан Республикасы Премьер-министры Алексей Песошин, Татарстан Республикасы премьер-министры урынбасары – республика Министрлар Кабинеты Аппараты җитәкчесе Шамил Гафаров һәм Хөкүмәт Рәисенең штаттан тыш киңәшчесе Олег Матыцин катнашты.
«2024 елда Россия Федерациясе БРИКС берләшмәсендә рәислек итә, һәм агымдагы шартларда әлеге мәйданчык безнең ил өчен өстенлекле әһәмияткә ия. Президент Владимир Путин кушуы буенча уздырыла торган БРИКС уеннары – илебезнең берләшмәдә рәислек итү планының мөһим өлеше, аларда катнашуын инде 97 ил раслады. Алда торган ярышларны иң югары дәрәҗәдә уздырырга кирәк. Казанның халыкара спорт чараларын оештыру буенча зур тәҗрибәсе бар. Быел Татарстан башкаласында киләчәк уеннары уңышлы узды, бу традиция БРИКС уеннары белән дә дәвам итәр дип ышанам», – дип билгеләде вице-премьер.
Ул искә төшергәнчә, уеннар ачылуга нибары 12 көн кала, шуңа күрә барлык әзерлек чараларын төгәлләргә кирәк.
Россия спорт министры урынбасары Алексей Морозов БРИКС илләренең спорт уеннарына әзерлек белән бәйле чараларны гамәлгә ашыру турында доклад белән чыгыш ясады.
«Чакыру кампаниясе тәмамланды. 97 илдән заявкалар алынган. Без 5 меңгә якын катнашучыны көтәбез, шул исәптән 4 меңнән артык чит ил катнашучысы. Оештыру комитеты йөкләмәсе буенча Россия Спорт министрлыгы алынган гаризаларны исәпкә алып, йомгаклау спорт программасын формалаштырды. Аңа 27 спорт төре керде», - дип билгеләде ул.
Министр урынбасары шулай ук БРИКС илләре спорт министрларының 22 июньгә планлаштырылган булачак очрашуы турында сөйләде: «Кытай, Берләшкән Гарәп Әмирлекләре, Мисыр, Эфиопия һәм Иран министрларының, шулай ук Һиндстан, Көньяк Африка Республикасы һәм Бразилия министрлары вәкилләренең катнашуы расланды. Әлеге очрашу кысаларында берләшмә илләренең спорт хезмәттәшлеген алга таба үстерү, шулай ук БРИКС киңлегендә уртак проектларны эшләтеп җибәрү мәсьәләләре һәм перспективалары турында фикер алышу планлаштырыла».
Россия шулай ук партнерларга Казанның БРИКС спорт хартиясен эшләде һәм тәкъдим итте. Хартия БРИКС пространствосында спорт хезмәттәшлегенең максатларын, принципларын, юнәлешләрен регламентлый, аларны гамәлгә ашыру механизмын, шулай ук берләшмәдә ил-рәиснең мәйданында Уеннарны уздыру шартларын күздә тота.
Моннан тыш, Россия спортчыларына – БРИКС уеннарында җиңүчеләргә һәм призерларга, шулай ук тренерларга һәм белгечләргә акчалата бүләкләү мәсьәләсе каралды.
«Ышаныч күрсәткәннәре һәм республика территориясендә әлеге чараны үткәрү мөмкинлеге өчен рәхмәт белдерәсем килә. Уеннарга әзерлек чорында республикада масштаблы эш башкарылды, барлык министрлыклар һәм идарә тармаклар да бу процесска максималь рәвештә җәлеп ителгән. БРИКС Уеннары югары оештыру дәрәҗәсендә узсын һәм үзебезгә йөкләнгән барлык йөкләмәләрне үтәсен өчен бөтен көчебезне куячакбыз, дип ышандырабыз», - дип билгеләде Алексей Песошин.