«Динамо» ФСҖ җитәкчеләре «Ак Барс-Динамо» хоккейчылары белән очрашты
22 августта, яңа сезон башланыр алдыннан, «Ракета» стадионы матбугат үзәгендә туплы хоккей буенча «Ак Барс-Динамо» командасы клуб җитәкчелеге белән очрашты.
Чарада Татарстан Республикасы «Динамо» ОГО ФСО Рәисенең беренче урынбасары Салават Гайсин, клуб директоры Валерий Носов һәм команданың баш тренеры Игорь Загоскин, шулай ук команда уенчылары һәм административ-тренерлар штабы катнашты.
Үзенең сәламләү сүзендә Салават Гайсин сезонга бурычлар билгеләде – Россия Кубогына уңышлы керү һәм ил чемпионаты плей-оффына чыгу. Салават Гайсин билгеләп үткәнчә, финанс хәле белән бәйле кайбер кыенлыкларга карамастан, команданың лаеклы һәм көндәшле уен күрсәтү мөмкинлеге бар – яхшы тренер, тәҗрибәле уенчылар, яшь, амбициоз егетләр.
Сәламләү сүзеннән соң Салават Гайсин һәм Валерий Носов команданың яңа уенчылары белән таныштырдылар, аларга уен номерлары төшерелгән хоккей майкалары тапшырдылар.
Аннары катнашучыларга баш тренер Игорь Загоскин мөрәҗәгать итте: «Безнең команда узган сезон белән чагыштырганда үзгәрде. Составта үзгәрешләр булды. Әмма иң мөһиме, без теләсә нинди шартларда команда булып калырга тиеш! Яңа сезонда уенның почеркы төгәлрәк һәм каллиграфик булсын иде».
Салават Гайсин һәм Валерий Носов командага алдагы матчларда уңышлар теләделәр.
Команда капитаны, атказанган спорт мастеры Игорь Ларионов Татарстан Республикасы «Динамо» ОГО ФСО җитәкчелегенә һәм клубка командага игътибарлары өчен рәхмәт белдерде һәм лаеклы уен күрсәтү өчен мөмкин булганның барысын да эшләргә вәгъдә итте.
Очрашу тәмамланганнан соң «Ак Барс-Динамо» хоккейчылары Ульяновск өлкәсендәге Хоккей федерациясе призларына турнирда (23–26 август) һәм Россия Кубогының 1 этабында (30 август - 6 сентябрь) катнашу өчен Ульяновскига юл тоттылар.