2013 елгы Универсиаданы оештыручылар FISU Башкарма комитетында беренчел хисап тоттылар. 3нче өлеш

«Казан 2013» Оештыру комитетының йомгаклау хисабын Россия студентлар спорты берлеге президенты Олег Матыцин башлап җибәрде. Ул Россиягә зур ышаныч баглап, илдә җәйге Универсиада уздыру хокукын биргәне ѳчен, FISUга рәхмәт белдерде. Бу сүзләргә ѳстәп, министр Рафис Борһанов FISUның Казанга ѳстенлек бирүе аркасында бѳтен илнең әлеге зур мультиспорт чарасын оештыру идеясе нигезендә берләшүен искә алып үтте. Россия президентының, ил хѳкүмәтенең, спорт министрлыгының һәм башка федераль хѳкүмәт органнарының, Татарстан Республикасы Хѳкүмәтенең тулы ярдәме белән 5 ел эчендә гаҗәеп зур күләмдәге әзерлек эшләрен башкарып чыгарга мѳмкинлек булды. Алар ярдәмендә Казан студентлар спортын үстерү, спорт чараларын оештыру һәм уздыру ѳчен бай мирас кабул итте. Бүген Казан дѳньяның иң спортлы шәһәрләре унлыгына керә һәм «мактауга лаек спорт каласы» сыйфатында халыкара спорт менеджменты ассоциациясенең бүләгенә ия. Казанда киләсе елда гына да берничә зур халыкара ярышлар узачак, ә 2015 елда су спорт тѳрләре буенча дѳнья чемпионаты үтәчәк, аннары исә, 2017 елда, шәһәр футбол буенча Конфедерацияләр кубогын, ә 2018 елда футбол буенча дѳнья чемпионаты матчларын кабул итәчәк.