Монреальдә «Казан йорты» беренче кунакларын кабул итте. 5нче өлеш
Канадада Казан һәм 2015 елда узачак су спорт төрләре буенча ФИНА дөнья чемпионаты тәкъдим ителә. Бу көннәрдә Татарстан делегациясенең Монреаль шәһәренә эшлекле сәфәре дәвам итә. 27 июльдән башлап 10 августка кадәр биредә «Мастерс» категориясендәге су спорт төрләре буенча 15нче дөнья чемпионаты уза. Турнирны үткәрү урыны – Жан Драпо паркы. Биредә Олимпия уеннары өчен махсус төзелгән, хәзер турнирны үткәрүдә файдаланыла торган спорт корылмалары урнашкан.
«Без Жан Драпо паркында күргәзмә павильоны – «Казан йорты»н оештырдык, ул инде беренче кунакларын кабул итәргә дә өлгерде», – дип хәбәр итте Монреальдән «Спорт проектлары башкарма дирекциясе» генераль директоры Азат Кадыров. Павильонның гомуми мәйданы 100 кв.метрдан артык. Ул киләсе елда Казанда узачак 16нчы «Мастерс» чемпионаты стилендә - шәмәхә төстә бизәлгән. Корылма бик уңайлы җирдә – ярышлар зонасына керү юлында ук урнашкан.
Павильон территориясендә очрашулар һәм әңгәмәләр үткәрү өчен махсус урын каралган. «Делегациянең Монреальдәге эшчәнлегенең төп бурычы – Казанны бай тарихлы һәм үсеш алган спорт инфраструктурасы булган күпмилләтле, инновацияләргә бай, спорт яратучы шәһәр буларак тәкъдим итү», - диде «Спорт проектлары башкарма дирекциясе» генераль директоры урынбасары Михаил Зотов.
Оештыручылар Казан йортында кунакларның күп булуын көтә, чөнки тамашачылар 2015 елда Казанда үтәчәк ярышларга карата зур кызыксыну белдерәләр. Кунакларны милли киемдәге кызлар татар халкына хас булганча кунакчыллык күрсәтеп каршы алачак. Алар барлык кунакларны да чәк-чәк һәм чәй белән сыйлар дип көтелә.
Бирегә килүчеләрне бик күп сюрпризлар көтә – сувенирлар һәм хәтта Казан буенча виртуаль сәяхәт тә булачак. Кунаклар шәһәрнең төп тарихи урыннарын – Казан кремлен, Кол Шәриф мәчетен, Сөембикә манарасын, Петропавел чиркәвен күрә алачаклар. Шулай ук киләсе Чемпионат барышында файдаланылачак спорт корылмаларын – «Казан арена» стадионын һәм Су спорт төрләре сараен, хай-дайвинг буенча ярышлар өчен каланчаны күрү мөмкинлеге дә булачак.
«Казан йорты»на кунакларны 2015 елгы дөнья чемпионаты талисманнары – Алсу һәм Итил кушаматлы ак барслар чакырып торачак. Биредә истәлеккә фото ясау өчен дә урын бар: керү юлында хай-дайвинг өчен каланча рәсеме төшерелгән 3D стикер урнаштырылган. 3D эффекты исәбенә фотода кеше каланчада басып торган һәм аннан суга сикергән сыман булачак. Монда ясалган фотоларны кунакларга #Masterskzn2015 хэштегы белән тәкъдим итәчәкләр.
Катнашучыларны һәм тамашачыларны җырчы Эльмира Кәлимуллина тавышы да сөендерәчәк. Монреальдә ул «Казан, мин сиңа ышанам» җыры белән чыгыш ясаячак. Чемпионат ярышлар әләмен «Мастерс» турнирының киләсе хуҗасы Казанга тапшыру белән тәмамланачак.