Казанда суга сикерү буенча Россия чемпионаты узачак

ДЧ-2015 һәм “Мастерс” категориясендәге дөнья чемпионатлары алдыннан спорт корылмасын сынау турнирында Мәскәү, Санкт-Петербург шәһәрләре, Мәскәү, Пенза, Воронеж, Саратов өлкәләре һәм Россия Федерациясенең башка төбәкләреннән килгән командалар катнашачак.

Ярышлар кысаларында спортчыларга бер һәм өч метрлы трамплиннардан, шулай ук 10 метрлы каланчадан сикерү программаларын күрсәтергә туры киләчәк.

Суга сикерү буенча Россия чемпионаты нәтиҗәләреннән чыгып тренерлар штабы Бакуда узачак I Европа Олимпия уеннарында һәм Казанда узачак Су спорт төрләре буенча ФИНА дөнья чемпионатында катнашу өчен Россия милли җыелма командасы составын формалаштырачак.