Владимир Сальников: “Казандагы ДЧ-2015тә, һичшиксез, йөзүчеләр бөтендөнья рекордлары куячаклар”
Казандагы Су спорт төрләре буенча дөнья чемпионатында йөзү бассейнында, һичшиксез, бөтендөнья рекордлары куячаклар, дип белдерде Бөтенроссия йөзү федерациясе президенты Владимир Сальников. Су спорт төрләре буенча дөнья чемпионаты Казанда 24 июльдән алып 9 августка кадәр узачак. Йөзүдә 42 комплект медаль уйнатылачак.
“Рекордлар, билгеле инде, булачак. Һичшиксез! Мин алар буласына ышанам, ә нинди дистанцияләрдә икәнен әйтмим (алдан), алайса, кызык булмаячак”, - диде Сальников.
Искәртәбез, Су спорт төрләре буенча ФИНА дөнья чемпионаты – Халыкара йөзү федерациясе чемпионатының 16 нчысы Россиядә, Казанда, 2015 елның 24 июленнән алып 9 августына кадәр узачак. Су спорт төрләре буенча бу зур халыкара ярыш Халыкара йөзү федерациясе җитәкчелегендә 1973 елдан бирле уздырыла һәм аңа 6 спорт төре керә – йөзү, ачык суда йөзү, суга сикерү һәм хай-дайвинг, су полосы һәм синхрон йөзү.
Спортчылар арасында 75 комплект медаль уйнатылачак, шуның 42се нәкъ менә йөзүдә булачак.