Казанның “Крылья Советов” паркында 2013 елдагы Универсиадага багышланган спорт бәйрәме уза
Казанның “Крылья Советов” паркында 12 нче июньдә 29 нчы Бөтенроссия Олимпия көненә багышланган чаралар узачак. Бәйрәм 2013 елда узган Универсиадага багышланачак - быел аны уздырганга - 5, ә Уеннарны уздыруга Казан заявкасы җиңгән көнгә – 10 ел . Шул уңайдан паркта спортның 4 төре буенча ярышла да уздырылачак.
Спорт программасы иртәнге 9.00 сәгатьтә башланып, кичке 18.00 сәгатькә кадәр дәвам итәчәк. Паркта кечкенә спортчылар өчен футбол турниры, баскетбол һәм пляж волейболы буенча студентлар арасындагы ярышлар һәм ветераннар арасында шахмат турниры да уздырылачак. Чарада катнашучыларны һәм кунакларны исә 2013 елдагы Универсиада талисманы – Юни исемле барс малае каршы алачак, Казанның иҗат коллективлары бәйрәм атмосферасы тудырачаклар. Тамашачылар конкурсларда катнашып, истәлекле призларга ия була алалар.
Ярышларга нәтиҗәләр кич белән ясала. Җиңүчеләрне мәртәбәле кунаклар бүләкләячәк.