Р. Борһанов: “Совет чорындагы күк, Казандагы Универсиадада тамашачы спортчыга көч биреп торырга барды, ә спортчы аңа моның өчен җиңү белән түләде”

Бүген ТР Яшьләр эшләре, спорт һәм туризм министрлыгында, Казанда узган XXVII Бөтендөнья җәйге Универсиадада Татарстан данын яклап, алтын, көмеш һәм бронза медаль яулаган республика спортчылары бүләкләнде. Министр Рафис Борһанов җиңүче спортчыларга һәм алар белән шөгыльләнүче тренерларга ТР Яшьләр эшләре, спорт һәм туризм министрлыгының мактау дипломнарын тапшырды.
“Биш ел буе бу киңкүләм вакыйгага илебез белән күмәк төстә әзерләндек. Шушы дәверне искә төшерсәң, күз алдына уңай вакыйгалар да, кимчелекле, тискәре ягы белән истә калган күренешләр дә искә төшә. Шулай да хәзер, барысы да лаеклы төстә оештырылды, дип кыю әйтергә була”, - дип ассызыклады Рафис Борһанов. Ул билгеләп узганча, спорт күзлегеннән чыгып караганда да, барлык фаразланган ниятләр дә чиктән ашты. Министр, спортчыларның Универсиададагы уңышлы чыгышларының, ата-аналар өчен дә яхшы үрнәк булачагына, аларның балаларын төрле спорт мәктәпләренә, үзәкләренә йөртүенә этәргеч ясаячагына ышанычын баглады. “Казанда күптөрле спорт корылмалары сафка бастырылды. Бүгенге көндә Казандагы кебек заманча спорт инфраструктурасы бүтән бер шәһәрдә дә юк. Сезнең казанышларыгыз спорт мәктәпләренә килүчеләрнең санын арттырыр дип уйлыйм”, - дип, Рафис Борһанов спортчыларның роленә басым ясады. Ул шушы очрашуга килгән, һәм төрле җыеннарга һәм ярышларга китеп баруы аркасында, бирегә килә алмаган спортчыларга һәм тренерларга олы рәхмәтен җиткерде.
“Универсиада безгә, киләчәктә дә илнең данын еракларга илтәчәк яңа исемнәрне ачты. Ил җыелма командасы составында Татарстан спортчылары яулаган медальләр өлешенең зур булуына да мин бик шатмын. Бу алынган медальләр, катнашкан спортчылар, ярышларны карарга йөргән тамашачылар саны буенча рекорд куйган Универсиада булды. Вакытыбызны бушка сарыф итмәвебезне дәлилли алдык”, - дип белдерде министр. “Совет чорындагы күк, Универсиадада спортчыларның һәм тамашачыларның бердәмлеге сизелде. Тамашачы спортчыны куәтләп торырга барды, ә спортчы аңа моның өчен җиңү белән түләде”, - дип шәрехләде Рафис Борһанов.
Искәртеп узабыз, илкүләм команда составында Татарстан спортчылары 20 алтын, 10 көмеш һәм 10 бронза медаль алуга иреште.
Очрашу азагында министр барлык спортчыларга һәм тренерларга уңышлар теләде. Аннан соң алар барысы бергә Татарстан Президенты белән очрашуга кузгалды.