Россия көнен бәйрәм итү уңаеннан Баулы районында «ГТО көне» үткәрелде
11 июньдә Баулы районының Кызыл Яр авылында ГТО нормативларын үтәү мәйданчыгында районның биш авылыннан балалар ГТО комплексы күнегүләрен башкардылар. «ГТО көне» чарасы «Спорт — тормыш нормасы» федераль проектын «Демография» милли проектын гамәлгә ашыру кысаларында узды.
Мәйданчыкта иң җитезләр, сыгылмалылар һәм чыдамлылар җыелды, һәркемнең уртак максаты – ГТО нормативларын үтәү һәм аерымлык билгесе алу. 6 яшьтән 11 яшькә кадәрге кызлар һәм малайлар өч сынау үттеләр: урыннан ике аяк белән этеп-төртеп озынлыкка сикерү, гимнастика эскәмиясендә басып торудан алга авышу, тәбәнәк аратада ятып эленеп торудан тартылу. Барысы да төгәл теркәлсен һәм ярышлар беркетмәсенә кертелсен өчен, һәр этапта ГТО судьялары эшләде. Алар билгеләп үткәнчә, балаларның барысы да күнегүләрне әллә ни кыенлыкларсыз башкарган.
«Алар бик тырышып нормативлар тапшырырга әзерләнделәр, бүген барысы да үзләренең физик әзерлекләрен күрсәтерләр дип ышанам, - дип сөйләде Баулы районы ГТО тест үзәге җитәкчесе Илнур Хәйруллин. - Биредә бик яхшы мәйданчык, шәһәрдә дә ГТО нормаларын үтәү өчен спорт мәйданчыклары бар, аларда уку елы дәвамында әзерләнәләр, тапшыралар. Гомумән алганда, шәһәр һәм район буенча 2014 елдан башлап 5 меңгә якын баулылы аерымлык билгеләренә ГТО нормативларын үтәгән. Хәрәкәтнең актив катнашучылары – мәктәп укучылары һәм пенсионерлар».
«ГТО көне» бәйрәменнән алган хис-кичерешләре белән Александровка мәктәбе укучысы Әнәс Маткомилов уртаклашты:
«Шәп чара. Мин аңа әзерләндем, нормативларны үтәргә күнегүләр ясадым. Бүген мин озынлыкка һәм авышлыкка сикердем инде, тиздән күтәреләчәкмен. Минем өчен бу иң катлаулы норматив, әмма мин бөтен көчемне куячакмын».
Соңгы катнашучы нормативларны үтәгәннән соң, судьялар нәтиҗәләр чыгарды һәм җиңүчеләрне ачыклады:
Беренче урынны – Кызыл Яр урта мәктәбе, икенче урынны — Яңа елга төп гомуми белем бирү мәктәбе һәм өченче урынны Александровка урта мәктәбе алды. Команда һәм шәхси беренчелектә җиңүчеләр дипломнар һәм ГТО символикасы төшерелгән бүләкләр белән бүләкләнделәр. Иң яхшы нәтиҗәләргә ирешкән катнашучылар аерымлык билгеләре белән бүләкләнәчәк.